ನುಗ್ಗೆಕಾಯಿ-ಗುಳ್ಳ ಸಾಂಬಾರ್

ಬೇಕಾಗುವ ಸಾಮಾಗ್ರಿಗಳು : -
ನುಗ್ಗೆಕಾಯಿ – 4
ಗುಳ್ಳ – 1
ಈರುಳ್ಳಿ – 2
ಕರಿಬೇವು ಸೊಪ್ಪು – 2 ಎಸಳು
ಕೊತ್ತಂಬರಿ ಸೊಪ್ಪು – 2 ಎಸಳು
ಇಂಗು ನೀರು 2 ಚಮಚ
ಉಪ್ಪು – ರುಚಿಗೆ ಬೇಕಷ್ಟು
ಹುಳಿ ನೀರು – 2 ಚಮಚ
ಬೆಲ್ಲ - ಲಿಂಬೆ ಗಾತ್ರದಷ್ಟು
ತೊಗರಿ ಬೇಳೆ – 1 ಲೋಟ
ಸಾಂಬಾರ್ ಪುಡಿ - 4 ಚಮಚ

ಸಾಂಬಾರ್ ಪುಡಿ ತಯಾರಿಸಲು : -
ಒಣಮೆಣಸು – 8
ಉದ್ದಿನ ಬೇಳೆ – 4 ಚಮಚ
ಕೊತ್ತಂಬರಿ – 2 ಚಮಚ

ಒಗ್ಗರಣೆಗೆ : - 
ಎಣ್ಣೆ, ಒಣಮೆಣಸು, ಸಾಸಿವೆ, ಕರಿಬೇವು ಸೊಪ್ಪು, ಉದ್ದಿನಬೇಳೆ, ಇಂಗು

ಮಾಡುವ ವಿಧಾನ : -

ಒಣಮೆಣಸು, ಉದ್ದಿನ ಬೇಳೆ ಮತ್ತು ಕೊತ್ತಂಬರಿಗಳನ್ನು ಕೊಬ್ಬರಿ ಎಣ್ಣೆಯಲ್ಲಿ ಪ್ರತ್ಯೇಕ ಪ್ರತ್ಯೇಕವಾಗಿ ಹುರಿದು ಸಾಂಬಾರಿನ ಪುಡಿ ಮಾಡಿಟ್ಟುಕೊಳ್ಳಿ. ಗುಳ್ಳವನ್ನು ಹೋಳುಗಳಾಗಿ ಮಾಡಿ ನೀರಿನಲ್ಲಿ ಹಾಕಿಡಿ. ನುಗ್ಗೆಕಾಯಿಯನ್ನು ಅದರ ಮೇಲಿನ ನಾರನ್ನು ತೆಗೆದು ಕತ್ತರಿಸಿ ಇಟ್ಟುಕೊಳ್ಳಿ ಮತ್ತು ಈರುಳ್ಳಿಯನ್ನೂ ಹೋಳುಗಳಾಗಿ ಕತ್ತರಿಸಿಡಿ. ಈಗ ತೊಗರಿ ಬೇಳೆಯನ್ನು ಅರಶಿನ ಹುಡಿ ಹಾಕಿ ಬೇಯಿಸಿ. ಇದಕ್ಕೆ ಗುಳ್ಳ, ನುಗ್ಗೆಕಾಯಿ ಮತ್ತು ಈರುಳ್ಳಿ ಹೋಳುಗಳನ್ನು ಹಾಕಿ ಬೇಯಲು ಇಡಿ. ಹೋಳು ಬೇಯುವಾಗ ಉಪ್ಪು, ಹುಳಿ ಮತ್ತು ಬೆಲ್ಲ ಹಾಕಿ ಕುದಿಸಿರಿ.  ಹೋಳು ಬೆಂದ ನಂತರ ಸಾಂಬಾರಿನ ಹುಡಿ ಹಾಕಿ ಕುದಿಸಿ. ಕೊನೆಯಲ್ಲಿ ಇಂಗುನೀರು, ಕೊತ್ತಂಬರಿ ಸೊಪ್ಪು, ಕರಿಬೇವು ಸೊಪ್ಪುಗಳನ್ನು ಹಾಕಿ ಒಂದು ಕುದಿ ಬರಿಸಿ ಒಲೆಯಿಂದ ಕೆಳಗಿರಿಸಿ ಒಗ್ಗರಣೆ ಕೊಟ್ಟು ಮುಚ್ಚಿಡಿ. ಸಾಂಬಾರ್ ರೆಡಿ.